ກອງປະຊຸມ ປຶກສາຫາລື ວຽກງານການຮອງຮັບຜູ້ອອກແຮງານລາວ ທີ່ກັບມາຈາກໄທ

​        ໂດຍ​ປະຕິບັດ​ຕາມ ​ແຈ້ງ​ການ​ຂອງ ກະຊວງ ຮສສ,ສະບັບ​ເລກທີ 2329/ຮສສ , ໃນ​ຕອນ​ເຊົ້າ ຂອງ​ວັນ​ທີ 4 ສິງຫາ 2014   ທີ່​ພະ​ແນ​ກ​ແນ​ງງານ ​ແລະ ສະຫວັດດີ​ການ​ສັງຄົມ​ແຂວງ​ສາລະ​ວັນ ​ໄດ​້​ໄຂ​ກອງ​ປະຊຸມປຶກສາ​ຫາລື​ວຽກ​ງານ ການ​ຮອງ​ຮັບ​ຜູ້​ອອກແຮງ​ງານລາວ ທີ່​ຖືກ​ທາງ​ການ​ໄທຜັກ​ດັນ​ກັບ​ຄືນ​ປະ​ເທດ ​ຂຶ້ນ. ​ໂດຍການ​ເປັນ​ປະທານ ຂອງ​ທ່ານ ສີ​ສຸວັນ ວົງ​ຈອມ​ສີ ຄະນະ​ປະຈຳ​ພັກ​ແຂວງ,ຮອງ​ເຈົ້າ​ແຂວງ​ສາລະ​ວັນ.ມີ ທ່ານ ນາງ ບຸນ​ທະວີ ດວງ​ລາສີ ກຳມະການ​ພັກ​ແຂວງ ປະທານ ສະຫາພັນ​ແມ່ຍິງ​ແຂວງ,ທ່ານ ບຸນ​ຍົງ​ ພາສີ ​ເລຂາ​ໜ່ວຍ ຫົວໜ້າ​ພະ​ແນ​ກ ຮສສ ​ແຂວງ ​ແລະ ມີ​ບັນດາ​ທ່ານ ທີ່ຢູ່​ໃນ​ຄະນະ​ກຳມະການ ​ແກ້​ໄຂ​ບັນຫາ​ແຮງ​ງານ​ລາວ​ທີ່ລັກລອບ​ໄປ​ທຳ​ງານຢູ່ປະ​ເທດ​​ໄທ​ແບບ​ຜິດ​ກົດໝາຍ ຕະຫລອດ​ຮອດ ພະນັກງານ​ວິຊາ​ການ ຢູ່​ໃນ ​ພະ​ແນ​ກ ​ເຂົ້າຮ່ວມ​ຢ່າງ​ພ້ອມພຽງ ລວມທັງ​ໝົດ 19 ທ່ານ,ຍິງ 7 ທ່ານ.

              ກອງ​ປະຊຸມ​ໄດ້​ຮັບ​ຟັງ​ການ​ຜ່ານ​ຂໍ້​ຕົກລົງ​ຂອງ​ທ່ານ​ເຈົ້າ​ແຂວງ​ສາລະ​ວັນ,ສະບັບ​ເລກ…………..ວ່າ​ດ້ວຍ ການ​ແຕ່ງຕັ້ງຄະນະຊີ້ນຳ​ຂັ້ນ​ແຂວງ ​ແລະ ຄະນະ​ປະຕິບັດ​ງານ​ຂັ້ນ​ແຂວງ ປັບ​ສະຖານະ​ພາບ​ໃຫ້​ແຮງ​ງານ​ລາວ​ທີ່​ໄປ​ອອກ​ແຮງ​ງານ​ຜິດ​ກົດໝາຍ ​ແລະ ​ແຈ້ງ​ການ​ຂອງ​ກະຊວງ ຮສສ,ສະບັບ​ເລກທີ 2329/ຮສສ,​ເລື່ອງ​ການ​ຮອງ​ຮັບ​ຜູ້​ອອກ​ແຮງ​ງານ​ລາວ ທີ່​ກັບ​ມາ​ຈາກ​ປະ​ເທດ​ໄທ ສະ​ເໜີ ​ໂດຍ​ທ່ານ ບຸນ​ຍົງ ພາສີ ​ເລຂາ​ໜ່ວຍ ຫົວ​ໜ້າ​ພະ​ແນ​ກ ຮສສ ​ແຂວງ.​ແລະ ກອງ​ປະຊຸມ​ຍັງ​ໄດ້​ຮັບ​ຟັງ​ທ່ານ​ ຂັນ​ໄຊ ຣັດຖະ​ເຮົ້າ ຫົວໜ້າ​ພະ​ແນ​ກ ການ​ຕ່າງປະ​ເທດ ຜ່ານ ​ແຈ້ງ​ການ​ຂອງ​ກະຊວງ​ການ​ຕ່າງປະ​ເທດ ສະບັບ​ເລກທີ 1479/ຕປທ.ກກສ.1,ລົງ​ວັນ​ທີ 15,ກ​ໍລະ​ກົດ 2014.

​ເລື່ອງ ທາງການ​ໄທ​ຈະ​ເພີ່ມ​ມາດ​ຕະການ​ຕໍ​ຜູ້​ຈະ​ເດີນທາງ​ເຂົ້າປະ​ເທດ​ຕົນ.ກອງ​ປະຊຸມ​ນຳ​ເອົາ​ເນື້້ອ​ໃນ​ຈິດ​ໃຈ​ຂອງ​​ເອກະສານ​ທີ່​ໄດ້​ຜ່ານ​ມາ​ຂ້າງ​ເທິງ​ນັ້ນ ມາປຶກສາ​ຫາລື ​ແລກປ່ຽນ​ຄຳ​ຄິດ​ເຫັນ ​ແລະ  ​ໄດ້​ຕົກລົງ​ເຫັນ​ດີ​ເປັນ​ເອກະ​ພາບ​ຄື:​ໃຫ້​ຄະ​ນະ​ກຳມະການ​ຊີ້​ນຳ​ຂັ້ນ ​ແຂວງ ​ແລະ ຄະນະ​ປະຕິບັດ​ງານ​ຂັ້ນ​ແຂວງ ຮີບ​ຮ້ອນ ​ເອົາ​ໃຈ​ໃສ່ ຈັດຕັ້ງປະຕິບັດ ​ໂດຍ​ຖື​ເອົາ​ສອງ​ເມືອງ​ທີ່​ມີ​ຊາຍ​​ແດນ​ຕິດ​ຈອດ​ກັບປະ​ເທດ​ໄທ​ຄື: ​ເມືອງ​ຄົງ​ເຊ​ໂດນ ​ແມ່ນ ດ່ານ ຄັນ​ທຸງ​ໄຊ ​ແລະ ​ເມືອງ​ລະຄອນ​ເພັງ ​ແມ່ນ ດ່ານ ຕະພານ ​ເປັນຈຸດ​ປະຕິບັດ​ງານ ​ເຊິ່ງສອງ​ເມືອງນີ້ ກວມ​ຜູ້​ອອກ​ແຮງ​ງານ​ລາວ ທີ່​ລັກລອບ​ລອບ​ໄປ​ທຳ​ງານ​ຢູ່​ໄທ​ຫລາຍ​ທີ່​ສຸດ ​ແລະ ຈະ​ໄດ້​ມີ​ການ​ກວດກາ​ສຸຂະພາບ​ໃຫ້​ຈຳນວນ​ແຮງ​ງານ​ລາວ​ທີ່​ກັບ​ຄືນ​ປະ​ເທດ​ນັ້ນ ​ໂດຍ​ບໍ່​ເສຍ​ຄ່າ​ໃດໆ​ເລີຍ.

          ຕອນ​ທ້າຍ​ຂອງ​ກອງ​ປະຊຸມ ທ່ານ ປະທານ ກອງ​ປະຊຸມ ກໍ່​ໄດ້ ​ເນັ້ນ​ໜັກ ກ່ຽວ​ກັບ​ວິທີ​ການຈັດຕັ້ງປະຕິບັດ​ຂອງ​ຄະນະ​ກຳມະການ ທຸກ​ພາກສ່ວນ​ທີ່​ກ່ຽວຂ້ອງ​ຈົ່ງ​ປະສານ​ງານ​ກັນ​ຢ່າງ​ກົມກຽວ ​ເພື່ອ​ເຮັດ​ໃຫ້ການ​ຈັດຕັ້ງປະຕິບັດ​ວຽກ​ໄດ້​ຮັບ​ປະສິດ​ພາບ ຢ່າງ​ສູງ​ສຸ​ດ,ກອງ​ປະຊຸມ​ດຳ​ເນີນ​ໄປ 1 ຄາບ ​ແລະ ​ໄດ້​ອັດ​ລົງ​ໃນຕອນ​ທ່ຽງ​ຂອງ​ວັນ​ດຽວ​ກັນ.

ຂຽນ​ໂດຍ:ນັກ​ຂ່າວ​ພະ​ແນ​ກ ຮສສ ​ແຂວງ​ສາລະ​ວັນ